A chariot race

I wrote this text as an introduction to the game: it depicts a typical race, with all the usual tricks and ruses. As for the lexicon, I only used termini technici found in the primary sources.

Reseratis carceribus et prolatis repagulis exeunt currus, favente suos quoque agitatores. Tam densa est caligo a cruribus equorum in medio curriculo sublata  ut quid accidat spectatores vix videre possint.

Statim Cyrnus evolat, alteris agitatoribus longe velocior, sed non cogitat, nimium gradum celerans, quantum campi restet. Secundo spatio exeunte experti et iam ad certamina circi adsueti fautores a gradationibus bene vident equos Cyrni pondus certaminis usque ad cretam non laturos.

Tertio spatio sine tricis peracto, Sorothus, albatae factionis, nimium spatioso metam circuit orbe et subito Diocles, a russatis adclamatus, ab laeva manu eum transit.

Cyrni equis nondum decrescentibus, reliqui celerare incipiunt. Epaphroditus, prasinae factionis, quartus sequitur, sed iam patet equos eius incessum certaminis ferre non posse.

Dum quinto spatio decrescit demum Cyrnus, venetis fautoribus eum valde increpantibus, quod equos nimium defatigaverit, Sorothus et Diocles certamen occupant. Nec a dolis abstinent: alter equos adversari in oculos verberat, alter retorquet axem et currum russati contra spinam premit, sperans ut ille, naufragium metuens, viam patefaciat. Parum abest quin id ambo faciant.

Diocles velocior, sed Sorothus, victoriam anhelans tamquam ille, effusis habenis instat, nec contactum a carru illius perdit. Sextum spatium tam excitata ac clamante turba peragitur ut agitatores consilia hortatorum audire non possint.

Ad cretam russatus et albatus currus propinquant, dum Epaphroditus et Cyrnus, equis fatigatis sed nondum fractis, ad dedecus vitandum certant.

Ultimam metam ambo stringunt, Diocles ne a latere interiore superetur, Sorothus ne Diocles effundat. A curva paene ad lineam exeuntes, rapidissimi ad palmas propinquant, cum Dioclis funalis equus, Afrus appellatus, ex abrupto exultat, in oculos a Sorotho verberatus. Nec quadrigam ultra tenere potest Diocles. Equi sternuntur, cernuus volvitur agitator russatus. Horrent detractrores faventesque simul, sed Diocles, habenis rescissis, etsi volneratus et victus, salvus est. Sorothus erumpit et vincit. Hodie tota Roma est albata. Albati ad stabula factionis in Trigario redeunt Sorothum adclamantes ut triumphantem ducem.